بەڕێوەبەرایەتیی گشتیی پۆلیسی فەلەستین لە کەرتی غەززە بە دەرکردنی بەیاننامەیەک ڕایگەیاند کە هێزەکانی پۆلیس لە ئەمڕۆوە لە هەموو ئەو ناوچانەی سوپای داگیرکەری سەهیۆنی لێی کشانەوەتەوە، جێگیر دەبن بۆ ئەوەی ئەرکەکانی خۆیان لە خزمەتکردنی هاووڵاتییان، پاراستنیان و پارێزگاریکردن لە ئاسایش و موڵکی گشتی و تایبەت ئەنجام بدەن.

بەگوێرەی ڕاپۆرتی ناوەندی ڕاگەیاندنی فەلەستین، لەم بەیاننامەیەدا هاتووە کە پۆلیسی فەلەستین سڵاوی خۆڕاگری و بەردەوامیی خۆی ئاراستەی خەڵکی خۆڕاگری غەززە دەکات و هاوکات لەگەڵ بەرزڕاگرتنی یادی شەهیدانی گەلی فەلەستین، هیوای زوو چاکبوونەوە بۆ بریندارەکان و ئازادی و ڕزگاربوون لە زیندانەکانی داگیرکەران بۆ دیلەکان دەخوازێت.

بەڕێوەبەرایەتیی پۆلیس جەختی کردووەتەوە کە ئەفسەرانی ئەم دامەزراوەیە لە چوارچێوەی پلانی وەزارەتی ناوخۆ و ئاسایشی نیشتمانیدا، دەستیان بە ئۆپەراسیۆنی جێگیربوون لە سەرانسەری کەرتی غەززەدا کردووە، بۆ ئەوەی یارمەتیدەر بن لە چەسپاندنی ئارامیی گشتی، دابینکردنی ئاسایشی هاووڵاتییان و ئاوەدانکردنەوەی ژێرخانی خزمەتگوزارییە شارستانییەکان دوای دوو ساڵ لە جەنگ و وێرانکاری.

لە بەشێکی دیکەی بەیاننامەکەدا، پۆلیسی فەلەستین داوا لە هاووڵاتییان دەکات لە کاتی گەڕانەوەیان بۆ ماڵ و گەڕەکەکانیان، زۆرترین ئاگاداری و وریایی بنوێنن و ئاگاداری بوونی هەر تەنێکی گوماناوی، پاشماوەی تەقەمەنی یان بۆمبی نەتەقیو بن.

بەیاننامەکە هۆشداری داوە کە هاووڵاتیان نابێت لە هیچ بارودۆخێکدا دەست لەو تەنانە بدەن یان بیانگوازنەوە و پێویستە دەستبەجێ هێزە پسپۆڕەکان ئاگادار بکەنەوە تاوەکوو مەترسییە ئەگەرییەکان بە شێوەیەکی سەلامەت و کۆنترۆڵکراو چارەسەر بکرێن.(İLKHA)